verkefnastjórn

Vönduð áætlanagerð er ein af grunnstoðum árangursríkra verkefna. Hún tryggir að framkvæmdir fari af stað með raunhæfar forsendur að leiðarljósi, að kostnaður og tími séu metin með skýrri aðferðafræði og að hægt sé að fylgja eftir markmiðum, stýra frávikum og forgangsraða aðgerðum þegar á reynir.

Hjá VSÓ Ráðgjöf starfa reyndir sérfræðingar við gerð áætlana á öllum stigum framkvæmda, allt frá frumstigi þeirra til endanlegrar útfærslu. Þar á meðal má nefna verkefnisáætlanir, byggingaráætlanir, framkvæmdaáætlanir, kostnaðaráætlanir, tímaáætlanir, arðsemismat og áhættumat. Áætlanir eru unnar í samráði við verkkaupa, hönnuði og aðra hagsmunaaðila og byggja bæði á reynslu og staðlaðri aðferðafræði.

Þegar endurbætur á byggingum eða niðurrif standa fyrir dyrum er endurnotkunaráætlun lykilverkfæri til að draga úr úrgangi og hámarka nýtingu efna. Til að tryggja að efni og búnaður fari ekki til förgunar að óþörfu er kortlagt vandlega hvað getur fengið framhaldslíf – hvort sem það er á sama stað, í öðrum verkefnum eða sem hráefni í nýjar lausnir.

VSÓ framkvæmir úttektir á ástandi byggingarefna og gerir endurnotkunaráætlun sem innifelur magntöku á helstu byggingarefnum og byggingarhlutum, flokkun og greiningu á leiðum til endurnotkunar og endurvinnslu. Einnig eru gerðar umhverfisúttektir til að skima fyrir spilliefnum og tryggja örugga meðhöndlun hættulegra efna.

Vandaður undirbúningur er lykillinn að því að það verkefni sem ráðast á í skili árangri og uppfylli þarfir verkaupa og notenda, hvort sem um ræðir mannvirkjagerð, þjónustu eða framleiðslu. Framkvæmdaráðgjöf VSÓ spannar ferlið frá því að hugmynd kviknar og þar til verkefnið er farið í hönnunarferli eða þjónusta eða framleiðsla hefst. Þar má m.a. nefna þarfagreiningu og skilgreiningu verkefnis, áætlanagerð, val á lausnum, samskipti við opinber yfirvöld og leyfisveitendur, val á útboðsaðferð, gerð útboðsgagna og umsjón útboða, sem og aðstoð við samningagerð.

Með faglegri framkvæmdaráðgjöf stuðlum við að því að verkefni hefjist með skýrri stefnu og samræmdri sýn og styðjum þannig verkkaupa í að taka upplýstar ákvarðanir og hámarka gæði og virði verkefnisins.

VSÓ tekur að sér umsjón útboða, fyrir bæði opinbera aðila og einkaaðila, og veitir ráðgjöf við alla þætti ferilsins m.a. val á útboðsleið, gerð útboðsgagna, umsjón á útboðstíma, mat tilboða, ráðgjöf við störf matsnefnda og aðstoð við samningsgerð í kjölfar niðurstöðu. Jafnframt höfum við yfir að ráða útboðsvef sem uppfyllir kröfur um rafrænt útboð ásamt því að stuðla að auðveldri gagnaumsýslu, rekjanleika samskipta og jafnræði bjóðenda.

Sérfræðingar VSÓ hafa víðtæka reynslu af umsjón fjölbreytilegra útboða – s.s. hönnunarútboða, samkeppnisviðræðna, stórra sem smárra framkvæmdaútboða og útboða á ýmiskonar þjónustu. Sem dæmi um þjónustuútboð má m.a. nefna búnaðarkaup, sorphirðu, gámaflutninga, akstur, ræstingar og útboð á aðstöðu fyrir rekstur ýmissar starfsemi s.s. leikskóla, heilsuræktar o.fl.

Gerð áætlana um viðhald og rekstur eigna er mikilvægur þáttur í því að verðgildi og notagildi þeirra haldist sem lengst.  Með kerfisbundinni nálgun má lágmarka rekstraráhættu, lengja líftíma bygginga og innviða, draga úr viðhaldskostnaði og stuðla að auknum lífsgæðum notenda. Einnig er mikilvægt að hugað sé að orkunýtingu, lofgæðum, aðgengismálum, öryggi og heilbrigði.

Sérfræðingar VSÓ meta ástand eigna, segja fyrir um nauðsynlegar aðgerðir, setja þær í forgangsröð og meta kostnað. Við styðjum jafnframt viðskiptavini við að móta viðhaldsstefnu sem byggir á ástandsgreiningu, notkun og væntanlegri þróun mannvirkisins. Með þverfaglegri þekkingu á byggingatækni, ástandsmati, eignastýringu og sjálfbærum lausnum stuðlum við að því að mannvirki haldi gildi sínu.