Stækkun Reykjanesvirkjunar, álit Skipulagsstofnunar (20.08.09)

Skipulagsstofnun hefur gefið álit sitt um mat á umhverfisáhrifum vegna stækkunar Reykjanesvirkjunar og frekari nýtingu jarðhitavökva samkvæmt lögum um mat á umhverfisáhrifum, nr. 106/2000. Meðal þess sem kemur fram í áliti Skipulagsstofnunar er að:  

• Yfirborðsvirkni og breytingar á hverasvæðinu geta haft neikvæð áhrif á fugla, aðallega kríu og hugsanlega einhverjar hveraörverur.
• Samlegðaráhrif núverandi virkjunar og stækkunar hennar geta verið verulega neikvæð með tilliti til gróðurs vegna áhrifa á yfirborðsvirkni.
• Aftur á móti kunna áhrifin að vera jákvæð fyrir sumar tegundir gróðurs og hugsanlega ferðamenn sem leið eiga um svæðið. Aukin yfirborðsvirkni hefur eyðilagt aðstöðu sem búið var að byggja upp fyrir ferðamenn í kringum hverasvæðið við Gunnuhver og takmörkun aðgengis og lokun svæðisins hefur skaðað ferðamennsku á Suðurnesjum mikið.
• Hávaði, bæði á framkvæmda- og rekstrartíma, getur haft neikvæð áhrif á upplifun ferðamanna sem fara um svæðið.
• Með tilliti til áhrifa á ferðaþjónustu og útivist er það mat Skipulagsstofnunar að jarðvarmavirkjun falli illa að svo sérstæðu svæði sem Reykjanes er náttúrufarslega.
• Samlegðaráhrif núverandi og fyrirhugaðra framkvæmda eru verulega neikvæð, með tilliti til landslags, nútímahrauna og verndargildis svæðisins.
• Í ljósi mismunandi skoðana, framkvæmdaraðila og sérfræðinga á vegum hans annars vegar og Orkustofnunar hins vegar, er erfitt að leggja mat á hver verði raunveruleg áhrif fyrirhugaðra framkvæmda á jarðhitakerfið. Einnig er mikil óvissa til staðar um áhrif á jarðhitakerfið, m.a. vegna stutts vinnslutíma.
• Óvissa er um áhrif vegna aukins magns affallsvatns sem berast mun til sjávar vegna fyrirhugaðrar stækkunar á lífríki sjávar og fjöru.
• Framkvæmdir við núverandi virkjun, vaxandi yfirborðsvirkni og fyrirhugaðar framkvæmdir við stækkun á og við svæði þar sem krían hefur orpið í gegnum tíðina, hefur haft og kann að hafa neikvæð áhrif á kríuvarp þó að fæðuskortur og ágangur vegfarenda hafi einnig neikvæð áhrif.
  

Skipulagsstofnun telur að við leyfisveitingar fyrir framkvæmdinni þurfi að gera HS Orku að standa fyrir vöktun á áhrifum virkjunarinnar á kríu, gróður, lífríki sjávar og fjöru og hitakærar örverur.

Nánari upplýsingar um verkefnið og álit Skipulagsstofnunar má finna hér á vef VSÓ og á vef Skipulagsstofnunar