Rannsóknarskýrsla um áhrif náttúruverndarlaga á framkvæmdir (18.04.08)

VSÓ Ráðgjöf hefur lokið við gerð rannsóknarskýrslu á áhrifum 37. gr. náttúruverndarlaga nr. 44/1999 á framkvæmdir. Samkvæmt þessari lagagrein kemur fram að ákveðnar skilgreindar jarðmyndanir og vistkerfi njóti sérstakrar verndar og forðast skuli röskun þeirra eins og kostur er.

Á undanförnum árum hefur umfjöllun aukist í matsskýrslum og matsferlinu um 37. gr. náttúruverndarlaga. Vægi umfjöllunar er jafnframt að aukast. Hins vegar var ekki ljóst hver afleiðing þessarar auknu umfjöllunar væri, hvorki m.t.t. útfærslu framkvæmda né landslags- og vistkerfisverndar. Einnig ríkti ákveðin óvissa um samræmi umfjöllunar í matsferlinu milli ólíkra framkvæmda. Í ljósi þessa þótti fróðlegt að skoða hvernig úrskurðað hefur verið í tengslum við 37. gr. náttúruverndarlaga í mati á umhverfisáhrifum á tímabilinu 1996 til 2006.

Tilgangur rannsóknarinnar var að skýra frá vægi 37. gr. í matsverkefnum, áhrifum hennar á ákvarðanir um framkvæmdir, að svara hverju lagaákvæði um landslagsvernd hafa skilað og bera saman umfang og eðli umfjöllunar hér á landi og erlendis í tengslum við landslagsvernd.

Rannsóknin var að hluta unnin fyrir fé úr rannsóknarsjóði Vegagerðarinnar. Samráðshópur sem skipaður var fulltrúum Umhverfisstofnunar, Skipulagsstofnunar og Vegagerðarinnar kom einnig að mótun verkefnisins. Höfundar skýrslunnar eru Auður Magnúsdóttir og Sigríður D. Jónsdóttir. Skýrsluna má nálgast hér heimasíðu VSÓ og á heimasíðu Vegagerðarinnar www.vegagerdin.is

Áhrif 37. gr. náttúruverndarlaga nr. 44/1999 á framkvæmdir