Bitruvirkjun - Yfirlýsing vegna athugasemda Gísla Más Gíslasonar (12.11.07)

VSÓ Ráðgjöf hefur gefið út meðfylgjandi yfirlýsingu vegna athugasemda prófessors Gísla Más Gíslasonar í fjölmiðlum undanfarið:

Reykjavík 12.11.07.

Yfirlýsing frá VSÓ Ráðgjöf

Vegna athugasemda prófessors Gísla Más Gíslasonar í fjölmiðlum undanfarna daga, um skýrslu um mat á umhverfisáhrifum vegna fyrirhugaðrar Bitruvirkjunar á Hellisheiði, vill VSÓ Ráðgjöf árétta að skýrslan var unnin af heilindum og metnaði, rétt eins og önnur verk starfsmanna VSÓ. Engum gögnum var stungið undan við gerð skýrslunnar, eins og prófessorinn hefur af einhverjum ástæðum gefið til kynna. Athugasemdum hans verður svarað á faglegan hátt á réttum vettvangi og munu athugasemdir hans og svör við þeim verða birt í endanlegri matsskýrslu sem allir hafa aðgang að.

Mikil vinna á sér stað áður en skýrsla sem þessi um mat á umhverfisáhrifum er gerð. Meðal annars er gerð matsáætlun sem er auglýst, auk þess sem hún er send til fjölda umsagnaraðila. Í því ferli komu engar athugasemdir fram um þá liði sem prófessorinn tiltekur í gagnrýni sinni. Með málflutningi sínum vegur prófessorinn harkalega að heiðri starfsmanna VSÓ að ósekju.

Fyrir hönd VSÓ Ráðgjafar,
Grímur Már Jónasson, framkvæmdastjóri.