Bygging háhýsis við Smáratorg vel á veg komin (24.08.07)

Framkvæmdir við Smáratorg, þar sem hæsta bygging landsins rís um þessar mundir, eru vel á veg komnar og óðum styttist í að byggingin verði tilbúin. Gólfplata 18. hæðar hússins var steypt fyrir nokkru og þá eru einungis tvær hæðir eftir því byggingin verður alls 20 hæðir. Fyrstu verslanir opna í október næstkomandi og starfsemi í turninum hefst í desember.

Mörg fyrirtæki munu að sjálfsögðu hafa aðsetur í byggingunni. Á fyrstu hæðinni verður m.a. 2.200 fermetra leikfangaverslun Toys ,R’ Us, húsgagna- og húsbúnaðarverslunin Pier 1 og tiltölulega stórt útibú Kaupþings banka. Af fyrirtækjum sem fyrirhugað er að verði á öðrum hæðum byggingarinnar má nefna endurskoðendafyrirtækið Delouitte & Touche á sex hæðum í turninum, líkamsræktarstöðina World Class á fimmtándu hæð og veitingastaðinn Turninn sem staðsettur verður á tveimur efstu hæðunum. Reikna má með að starfsmenn í byggingunni geti orðið allt að sex til sjö hundruð talsins.

Til að auðvelda þá umferð sem vænta má í kringum turninn við Smáratorg, sem og aðra starfsemi í nágrenninu, verður 5.000 fermetra bílastæðabrú byggð yfir Fífuhvammsveg þar sem bílastæðin á annarri hæð Smáralindar munu tengjast háhýsinu og samfellt bílastæði verður því þar á milli. Til að létta enn frekar á umferð mun verða hægt að aka beint af Reykjanesbraut og inn á bílastæðapallinn. Framkvæmdir eru þegar hafnar við byggingu brúarinnar og gert er ráð fyrir að hún verði tilbúin í nóvember 2007.

VSÓ Ráðgjöf sér um verkefnisstjórn og framkvæmdaeftirlit við byggingu háhýsisins við Smáratorg.

Nokkrar skemmtilegar staðreyndir um bygginguna:

• Veitingastaðir verða á 19. og 20. hæð, skrifstofur á 3-18 hæð, verslanir á 1. og 2. hæð og bílageymsla í kjallara.
• Byggingin verður sú hæsta á landinu, 77,6 m og 20 hæðir. Til samanburðar má geta þess að Hallgrímskirkjuturn er 76 metra hár.
• Verslunarrými verður í 7.000 m2
• Bílageymslur verða 10.000 m2
• Windowmaster gluggakerfi verður í húsinu, náttúruleg loftræsing um opnanlega glugga sem stýrist af veðurstöð á þaki þess.
• Í byggingunni verða fimm háhraðalyftur og er mesti hraði þeirra 4 m/s. (Hefðbundnar lyftur ná 1,6 m/s). Ein lyftan verður sérhönnuð fyrir slökkvilið. Lyfturnar verða ennfremur með “gervigreind”, þ.e. þær læra á umferðina í húsinu og standa tilbúnar á þeim hæðum þar sem umferð er mest á hverjum tíma.