Framkvæmdir í Flugstöð Leifs Eiríkssonar (11.12.06)

Framkvæmdir við Flugstöð Leifs Eiríkssonar ganga vel og áfangar í verkinu nást jafnt og þétt. Þann 1.desember var nýr og glæsilegur farangurssalur tekinn í notkun en þar er nýtt og mun afkastameira farangursfæribandakerfi sem leysir það gamla af hólmi. Komufarþegar fara nú um nýtt stigahús niður á 1. hæðina. Þegar þangað er komið geta farþegar valið um að ganga beint inn í komuverslun Fríhafnarinnar eða halda innar á hæðina að nýjum farangursböndum til að sækja farangur.

Nú þegar er byrjað að þilja af gamla stigann sem komufarþegar notuðu áður á leið sinni inn í landið. Stiginn verður fjarlægður og verður það verkefni að öllum líkindum síðasta stóra múrbrotið sem ráðist er í inni í sjálfri flugstöðinni vegna stækkunar og breytinga.

Eftir áramótin verða allmiklar breytingar í innritunarsal flugstöðvarinnar. Tekin verða í notkun ný innritunarborð sem ganga til austurs þvert á þá línu innritunarborða sem nú eru á 1. hæðinni. Nú er einnig verið að byggja glerskála á norðurhlið en þeir munu skapa aukið rými í innritunarsal. Afköst innritunar munu aukast verulega með þessum aðgerðum sem áætlað er að ljúki fyrir páska.

Óðum styttist í verklok þessa mikla og flókna verkefnis sem felst í breytingum á Norðurbyggingu flugstöðvarinnar. Áætlað er að framkvæmdum verði lokið í byrjun apríl næstkomandi en þá eru 20 ár liðin frá því að flugstöðin var vígð.

Á meðfylgjandi myndum má sjá hluta af nýjum farangurssal flugstöðvarinnar ásamt stigahúsi fyrir komufarþega.