Ný aðstaða vopnaleitar í Flugstöð Leifs Eiríkssonar (04.04.06)

Þriðjudaginn 4. apríl, var tekin í notkun ný aðstaða fyrir vopnaleit í Flugstöð Leifs Eiríkssonar. Þetta er fyrsti áfangi í endurgerð 2. hæðar og er vopnaleitin því fyrsta starfsemin sem flytur á þann stað sem henni er ætlað til framtíðar. Í samræmi við íslenskar hefðir var unnið alla nóttina til að gera allt klárt fyrir fyrstu farþegana sem fóru um svæðið um kl. 5:30. Allt gekk að óskum enda er öll aðstaða fyrir farþega og starfsmenn til fyrirmyndar.

Framkvæmdirnar sem nú standa yfir í Flugstöð Leifs Eiríkssonar eru mjög umfangsmiklar. Þær felast í því að stækka Norðurbyggingu flugstöðvarinnar um 14.000 m² og endurgera alla 2. hæð byggingarinnar. Þegar þessum framkvæmdum er lokið hefur brottfararsvæði farþega verið stækkað um helming og öll aðstaða fyrir starfsemi í flugstöðinni verið endurbætt. Áætlað er að ljúka þessum framkvæmdum vorið 2007.