Bakkafjöruhöfn, Bakkafjöruvegur og efnistaka á Seljalandsheiði

Fyrirhuguð er bygging ferjuhafnar í Bakkafjöru í Austur-Landeyjum með það að markmiði að bæta almenningssamgöngur milli Vestmannaeyja og fastalandsins. Til þess þarf vegtengingu að höfninni frá Hringvegi og efnistöku vegna framkvæmda á Seljalandsheiði og úr Markarfljótsaurum.

Framkvæmdaraðilar eru Vegagerðin og Siglingastofnun. Undirbúningur hefur miðast við að framkvæmdir geti hafist árið 2008 og að höfnin verði tekin í notkun árið 2010. VSÓ Ráðgjöf hefur annast mat á umhverfisáhrifum þessara framkvæmda.

Höfnin, sem nú hefur verið nefnd Landeyjahöfn, verður staðsett skammt vestan ósa Markarfljóts á Landeyjasandi. Til stendur að leggja að höfninni 11,8 km langan veg vestan Markarfljóts s.k. Bakkafjöruveg. Hann mun liggja um svæði á náttúruminjaskrá þar sem er fjölbreytt fuglalíf. Fjallað er um þann valkost að nýta núverandi vegakerfi um Austur Landeyjar og leggja nýjan 5 km veg frá Bakkaflugvelli að höfninni. Framkvæmdaraðili hefur lagst gegn þeim kosti þar sem núverandi vegakerfi býður ekki upp á nægt umferðaröryggi.

Opnuð verður ný náma á Seljalandsheiði þar sem fundist hefur berg vel fallið til byggingar brimvarnargarða. Einnig verður tekið efni úr Markarfljóti til vegagerðar.

Helsti kostur reksturs ferju frá nýrri höfn er að ferðatími milli lands og Vestmannaeyja á sjó styttist úr 2:45 klst miðað við núverandi ferju í 30 mín. Vegalengdin sem farin er á sjó styttist úr 74 km í 13 km.

Frummatsskýrsla

Matsáætlun

Sérfræðiskýrsla, Fuglar - Viðbótarathuganir