Ferðamál
Ingibjörg Guðrún Guðjónsdóttir ferðamálafræðingur tók saman upplýsingar um Ferðamannastaðinn Þríhnúka. Í samantekt kemur fram að Þríhnúkagíginn þurfi að gera þannig úr garði að hann geti tekið mikinn fjölda fólks og hafi sem fjölbreytilegast notagildi. Markhópurinn í sölu aðgöngumiða væri jafnt innlendir sem erlendir ferðamenn og gera þarf ráð fyrir minnst 500.000 gestum á ári. Opnun Þríhnúka hefur mikið aðdráttarafl í tengslum við markaðssetningu og stofnun Eldfjallagarðs á Reykjanesi. Lögð er áhersla á að gera þurfi ráð fyrir góðum göngustígum. Mikilvægt er að bjóða upp á sem víðtækasta afþreyingu og er nefnt Eldfjallasafn, norðurljósasetur, vísindasafn, veitingasala, minjagripaverslun, veislu- og fundaraðstaða og að tengja uppbyggingu við ferðaþjónustu í Bláfjöllum.
Gunnar Páll Eydal MRM hefur unnið fyrir Bláfjallafólkvang skýrsluna Sjálfbær þróun í Bláfjöllum, kerfi til sjálfbærrar stjórnunar (Desember 2004). Verkefnið er úttekt á skíðasvæðinu í Bláfjöllum og hugmyndir hvernig gera megi skíðasvæðið og fólkvanginn sjálfbærari í rekstri. Hluti verkefnisins er skilgreining á neikvæðum umhverfisþáttum af völdum átroðnings ferðamanna á svæðinu.
|
